Kabarliv 2014

Kabarliv 2014

In premié siksé :

Léspozisyon bann livre ? Néna plizir, issi, La Rényon, soman la-poin inn spéssial po bann livre an kréol, oubiensa dann léspri kréol. Po sa-mème, lané 2014, Lofis la lang Kréol La Rényon èk lassosyasyon Tikouti i désside kréé in Kabarliv la kréolité (jordi Kabarlire la kréolité)

Zot projé : fé la fète po lo livre kréol, lo livre an kréol, dann toute lang kréol dessi la Tère.

Mé-soman, akoz pa dann d’ot lang, si bann livre dann lézot lang-la néna in bon gou-d’sèl la kréolité ?

In léspozisyon livre ? Oui ! Livre po regardé, po féyé, po ashté… po lire apré.

Koze èk bann zékrivène, zékrivin ; réfléshi èk zot dessi la litératir ; demande bann-la dédikasse zot livre po ou…

Parlfète, po koze litératir kréol, Kabarliv i invite in bon-pé zékrivène/zékrivin,  zunivèrsitèr – in-pé i abite La Rényon, d’ot La Guyane (po lo plus loin), Lil Moris (po lo plus pré), Rodrig, Séshèl, Guadloupe, Martinik, Ayiti, Lamérik.

Po Lofis, i fo pa Kabarlire rienk in léspozyson livre dessi troi zour. Konsèr shanté, kabar fonnkèr (po gran-moune, po marmay), zatlié po marmay  jisteman ; téate, la mizik, zistoir, sinéma, léspozisyon… toute-sa-la, Lofis i ofèr demoune i vien Kabarlire.

Toute ansanm i fé in ron, in gran ron èk lo livre dann milié. Lo livre, toultan lo livre, lo livre la kréolité.

Lo zafèr i roule ron. Lo premié Kabarliv/ Kabarlire i marshe joli, èk in bon-pé vizitèr, gran-moune parèye marmay.

Si lavé poin lo dévouman toute bann zorganizatèr bénévol, bann zanimatèr bénévol ; san la solidarité bann rakontèr, shantèr, zékrivène-zékrivin, san la komine Le Port, san lo TSA, san lo soutien la Dac-oI, la Région La Rényon, lo départman La Rényon, rien (in tiork) nou noré gaingne fér.

Po son premié Kabarliv/ labarlire Lofis i rande in lomaje troi moune la-vanje toultan po la kultir rényoné : Dédé Lansor, Franswa SintomèrSudel Fuma.

Bann partisipan an 2014 :

• Sully Andoche (La Réunion)
• Maryvette Balcou (La Réunion)
• Joëlle Brethès (La Réunion)
• Arnaud Carpooran (Ile Maurice)
• Luc Clair (Rodrigues)
• Anne Cheynet (La Réunion)
• Penda Choppy (Seychelles)
• Lindsey Collen (Ile Maurice)
• Brigitte Croisier (La Réunion)
• Joëlle Ecormier (La Réunion)
• Alain Ferrere (La Réunion)
• France-Line Fontaine (La Réunion)
• Gilles Gauvin (La Réunion)
• Jérome Giovannoni (La Réunion)
• Halima Grimal (La Réunion)
• Isabelle Hoarau (La Réunion)
• Jean Jonassaint (Haïti)
• Daniel Maximin (Gouadeloupe)
• Robert Nazaire (Martinique)
• Lambert Felix Prudent (Martinique)
• Max Rippon (Guadeloupe)
• Sylviane Vayabouri (Guyane)
• Dev Virahsawmy (Ile Maurice)